殺豆四大兇器

一粒咖啡豆炒好,有兩件事繼續進行,分別係:

  1. Chemical transportation 化學物嘅移動,由A點去B點。
  2. Chemical transformation 化學物嘅轉變,由X變成Y。

當中嘅速度,係會由四大兇器去決定:

  1. 氧氣 好籠統講就係「氧化」,所有食物都會因為有氧氣嘅存在而變質。工業化食品攪包裝,保鮮期 shelf-life 同利潤嘅直接關係下,會用唔同方法攞走呢個因數。一般會用吸氧劑同充氮氣。後者成本較平,所以好多食品都會用到,例如薯片。(所以幾餓都好,包卡樂B 無漲起就唔好買!已走氮入氣!)
  2. 光線 – 能夠改變咖啡豆表面嘅結構,正常咖啡豆包裝,都唔會見到有透明。
  3. 熱力 – 化學物要郁同變,都需要熱力做能量。所以越低溫係對保鮮越有利。
  4. 濕度 – 濕度會比細菌滋生外,同時亦會將香氣帶走。

當你打開一包豆用,又想做到:「頭一個月風味最完整,兩個月內都可以接受」,最低要求係密封、低濕不透氣。打個比喻,就係開咗一包薯片,你要有措施keep住佢香脆。

香港夏天濕度高,就算攞個密封容器,包薯片都會好快變冧;冬天會好d,但就算keep到脆,擺到有一日都會變“益” (油份子氧化變壞)。簡單講就係一包薯片打開後,無咗絕對零濕零氧下,係一個同時間競賽嘅遊戲。

所以咖啡豆同其他食物一樣,都係炒好後盡快享用為佳。家用設備下,真係有需要擺耐d,可以入雪櫃/冰格,但一定要100%防潮密封,同記得要100%解凍先好打開包裝,以防止水珠凝結。(即係飲冰水個杯面有水珠果個現象呢~ )