磨豆器平貴有別?

初入咖啡坑時，一聽到話朋友話要買部過千蚊嘅磨，即時頭頂彈咗好多個問號，當時唔好話半信半疑，係直頭唔信。

現在入坑已深下，心態已變成 4位數＄係合理，5位數先叫貴😅。呢篇blog係教大家睇細粉測試數據，去量化磨豆器嘅出粉分別，跳出籠統講法：「靚磨少d細粉囉」。

我地先睇睇下圖，攞一個對啡粉大細嘅概念：

第一行：一粒原豆，未磨前係 6mm 闊，一克（g) 有 6 粒豆。

第三行：粗磨到每粒粉 1.5mm 闊，一克由 6 粒豆分成 384 粒粉。

最尾一行：磨到去做 espresso 粗幼，每粒粉 0.2mm (200 μm /micron/微米) 闊，一克，就已經變成有 491,440 粒粉。

萃取概念：越磨得細，每一克就越多粉，直接接觸水嘅面積亦隨之增加

細粉就係形容 200 μm 以下嘅粉，有幾幼? 比幾個實物數字大家幻想下：

沙糖係 450 – 650 μm ，鹽係 ~100μm，爽身粉係 10μm

手沖學術說法會定粉 size 去 700-800μm 之間，坊間做法會係由 400μm 起，視付用咩濾杯、沖法。

呢家係時間沖定杯咖啡，因為下圖我驚你一睇就暈 （取自 Baratza Vario，一部 prosumer 級嘅電磨）

呢個係 grind distribution 圖，一個圖可以解答到一部磨豆器磨出嚟，究竟有幾多細粉。專業級數嘅磨，廠方一般都會跟係spec入面比人參考。外國有玩家會自制分享比啡友。有機會我再寫可以點做，希望有一日香港亦可以有同類分享。

講返上圖，凈睇 紅 、 黑 兩條線

紅色係廠家調到佢認為適合做espresso嘅粗幼，大家會睇到 400μm 粉佔最多，其次就係 50μm 細粉。呢個就係標準 bimodal 粉，即係有大有細。(有機會再講咩係bimodal，同點解要設計成咁）

黑色係調到去做手沖用，大家會見到 800-1500μm 為主，200μm 下嘅細粉只有微量。可以算是 unimodel，即係d粉集中一個size。

簡單講，呢個圖就係廠方想說服客人，我隻磨做手沖細粉少，比錢買喇💸。

再睇多個圖，由一個好出名嘅獨立 test lab socratic coffee 自制，比較神級 EK43 (5位數字$$$$$) 同 Baratza Sette (四位數字 $$$$) 嘅 espresso 粉：

你會睇到，兩隻都係 bimodal 粉，EK條 curve 係比 Sette 尖同高，即係佢嘅粉同Sette比，係會較集中喺一個 size，較 “平均”。

點解成日追求平均呢？試想象下，一堆粉，大小不一下，細粒係會比大粒快被萃取。所以越平均，就對平衡萃取越有利，避免出現細粒過萃了，但係大粒又萃唔夠。

「平均」就係點解要比5位$買隻磨，有機會自己試同一隻豆，同一個沖法，睇下自己飲唔飲得出唔同磨嘅分別喇！

睇完記得like同分享，比d動力我去寫下一篇工程佬blog！