手動/拉槓 espresso 機適合新手嗎?

早陣子教室有谷友post拉杆機嘅片，騷動一輪。如果問我適唔適合新手用，我嘅答案會同問我玩espresso點開始一樣 —– 嚇咗你要花錢買啱用嘅磨豆機、又要花時間學先。比我嚇過嘅朋友可能覺得我好古怪，其實我只係唔想地球又增加多幾件垃圾，又唔想大家洗冤枉錢。因為espresso同手沖係完全兩個世界嘅嘢。

宏觀去睇，做 espresso，由磨粉、布粉再到壓粉開始睇，當中已經有多個要控制嘅變數。

用半自動機去沖煮，壓粉後，出水壓力基本上係一組constant（電水pump關係)；但係拉杆嘅話，手臂肌肉下，就變咗再多一組變數。

新手無經驗，由零開始玩拉槓，就變咗要同時處理兩組變數。唔係唔得，係會路途崎嶇d先成師。

有影相知識嘅朋友，一個好近嘅比喻：半自動機係光圈先決；而拉桿就係 M mode 手動模式。影相鬆郁矇可以delete，咖啡苦澀酸 delete 前你點都要飲一口。唔係咁好玩的。

總結：真係要由零開始玩，我建議買半自動機，拉桿留番學識後，再玩上去。