石頭記

前幾日同朋友傾清刀盤時，佢send佐張相比我睇佢部靚靚 Kalita 中石崩盤嘅慘烈實況。深表同情之際，借佢張相做topic，講下點解有石仔 （聲明：呢個朋友係用開自己豆）

點解會有石仔？正常精品啡都會用人手摘咖啡果，咖啡樹唔會生石，對嗎？一粒豆由樹到處理到入袋，中間大部份都係露天，天然意外緊會有。人為原因亦都可能會有，特別係d合作社出黎嘅豆，小莊園交豆時，可能會放石呃秤比上線莊家。

睇到呢到係咪好驚自己飲緊真正礦物水?

其實有三度防線：
第一度係處理廠，生豆會喺篩豆過程中，用人工同機器，飛沙走石。

第二度係去到烘焙師手中，用人工或機器，check好先開始炒。Panhouse小品炒量唔多，全人手做。而大型烘焙廠都會用機器去做，因為量大下，城市人工做唔合成本效益。

第三度就應該係 barista （你地呀！）。做精品每次秤豆先磨最大好處，就係會用眼去睇下自己秤緊d乜。真係咁不幸比粒石過佐三條防線，其實仲有一度，就係你部grinder。 手磨，磨到個位突然好緊，咁唔該拆開佢檢查，真係中石就夜晚去買張六合彩。

機磨唔識feel，就睇下石硬定盤硬。金屬盤有個好處，就係有機會 盤硬過石，另到 jam盤燒fuse。好多時grinder都會跟機有fuse送，方便你自己換。

如果 石硬過盤，就會有機會磨崩盤。陶瓷盤因為硬度低，特別容意出事。呢個亦都係我唔buy陶瓷機磨嘅原因。

其實仲有最最最後一度，就係手沖filter紙，理論上你最多係飲到納米級嘅礦物質，石仔最終係停佐係濾紙上面。^.^